Легендарниот аргентински центар е пред враќање во Европа бидејќи Реал Мадрид сака да направи победничка аргентинска четворка додавајќи го ветеранот на Кампасо, Лапровитола и Дек.
Скола, кој веќе наполни 40 години и моментално игра за кинескиот клуб Шанхај Шаркс, може да се врати на Стариот континент бидејќи за него интерес пројави кралскиот клуб од Мадрид.
И покрај поодминатата возраст, Скола на Мундијалот во Кина покажа дека за него времето како да стои. Ја донесе Аргентина до финале, а во просек постигнуваше 17,9 поени, 8,1 скокови и 1,8 асистенции.
Реал не за џабе го бара. Во клубот моментално се неговите репрезентативни колеги Факундо Кампасо, Николас Лапровитола и Габриел Дек. „Кралевите“ ја знаат победничката формула.
Скола последен пат во Европа беше во 2007 кога настапуваше за Тау Серамика, сегашна Басконија. Токму тој клуб може да му направи пороблем. Имено, кога Скола премина во НБА потпиша клаузула со баскискиот тим според која доколку добие понуда од Европа сегашна Басконија има право да ја израмни и автоматски Скола да мора да оди кај нив.
Во НБА тој почна од Хјустон Рокитс, а потоа играше и за Феникс Санс, Индијана Пејсерс, Торонто Репторс и Бруклин Нетс. Кариерата ја почна во аргентинскиот Феро Карил Оесте.