Американскиот фотограф Џоел Сарторе, во соработка со National Geographic, е заслужен за проектот „Photo Ark“, во кој фотографира животни од загрозен вид. Иако фотографот вели дека тоа воопшто не е лесна работа, сепак продолжува со проектот со цел да им покаже на луѓето колку е важно зачувувањето на овие видови животни.
Во последната деценија Џоел има фотографирано повеќе од 6.000 видови во 40 земји, а неговиот проект е вистинска инспирација за светот. Идејата ја добил откако неговата сопруга се разболела од рак, а тој морал да се грижи за неа во текот на лекувањето, но и за трите малечки деца во домот.
Како што се подобрувала состојбата на неговата сопруга, фотографот почнал да се враќа на работата, увидувајќи дека многу малку внимание се посветува на загрозените видови. Кога жена му закрепнала, тој повторно ја зел камерата во раце и почнал да прави инспиративни фотографии од загрозени животни.
Така е започнат проектот за кој фотографот се надева дека ќе содржи документација од 12.000 видови и ќе им биде добар извор на идните генерации.