Наместо да правите класични ќофтиња во сос од домати, ви ги предлагаме овие полнети со зеленчук и кашкавал.
Од мелено месо можете да направите најразлични јадења, а ќофтињата се едни од најдобрите. Нивната подготовка не е комплицирана и на сите им успева, а ние ви предлагаме уште денес да го пробате овој рецепт. Направете ќофтиња полнети со фил од зеленчук и кашкавал, а по желба можете да додадете уште една состојка.
Состојки:
- 800 гр мелено месо
- 1 кромид
- сол
- бибер
- блага пипер
- лук во прав
- масло
- магдонос
за полнењето:
- 1 кромид
- 2 домата
- ⅓ бабура
- 140 гр кашкавал
- 1 лажица мајонез
Подготовка:
Во сад измешајте мелено месо, исечканиот кромид, сол и бибер, па посипете со блага пипер и лук во прав. Сè убаво измешајте со раце, па покријте со проѕирна фолија и ставете во фрижидер половина час.
Во сад измешајте го ситно исечканиот кромид со бабурата, доматите и ренданиот кашкавал. Зачинете со сол и бибер и додадете мајонез, па сè добро измешајте.
Плехот подмачкајте го со масло, па ставете округол калап. Месото ставете го внатре, а потоа притиснете ја средината со навлажнета чашка за ракија за да направите вдлабнатина. Правете го тоа додека не го потрошите месото, а потоа наполнете ја секоја вдлабнатина со филот.
Печете на 180°C околу 35 минути, а кога ќе ги извадите украсете со свеж магдонос.