Ѕвездата на НХЛ и играч на Вашингтон Капиталс, Александр Овечкин, обелодени дека привремено се повлекува од играњето хокеј поради смртта на неговиот татко.
Вашингтон Капиталс објави дека 37-годишното лево крило одредено време нема да му биде на располагање на тимот, а самиот капитен на клубот од главниот американски град со порака на Instagram ѝ се обрати на јавноста.
„Денес го загубив татко ми. Благодарам на сите за поддршката, но ве молам да имате разбирање и да не го вознемирувате моето семејство во овие тешки моменти за нас. Благодарам“, порача Овечкин.
Не е познато колку долго Овечкин ќе отсуствува од мразот, а тренерот на Капиталс, Питер Лавиолет, рече дека не верува дека Овечкин ќе се врати во блиска иднина.
Рускиот хокеар е втор најдобар стрелец во НХЛ со 812 голови, веднаш зад легендарниот Вејн Грецки. Во НХЛ игра од сезоната 2005/2006, а претходно настапуваше за московски Динамо. Во 2018 година конечно на Вашингтон му го донесе Стенли купот.
Неговиот татко Михаил живееше во Вашингтон и беше редовен посетител на тренинзите на тимот и на натпреварите, а се дружеше и со навивачите.
„Со постојана насмевка на лицето, тој сакаше да комуницира со нашите фанови и да изразува благодарност за поддршката на неговиот син, на кој беше неверојатно горд. Мислите на нашата организација се со семејството Овечкин во ова тешко време“, гласи дел од пораката на клубот.