Европскиот автомобилски пазар се збогатува за уште еден конкурентен бренд и тоа од Турција.
Минатата недела гордо беше претставен првиот модерен турски автомобилски бренд TOGG кој планира да внесе сериозна конкуренција на пазарот.
Автомобилот, од кој беа претставени два прототип модела – лимузина и електричен SUV – беше тестиран и промовиран од претседателот Реџеп Тајип Ердоган лично.
„Денеска е историски ден, исполнување на сонот кој го чекавме повеќе од 60 години. Нашиот сон да имаме автомобил што користи домашна технологија, го направиле наши инженери и дизајнери, конечно е остварен“, рече гордо Ердоган и вети дека ќе биде првиот купец на новиот автомобил.
Но, она што беше повеќе од очигледно е дека во поглед на дизајнот, е дека автомобилот во голема мера се темели на SUV моделот K350 од 2018 година на италијанската компанија Pininfarina.
Се очекува на пазарот прво да стигне електричниот SUV TOGG кој ќе биде достапен во две изведби. Верзијата со погон на задните тркала развива 200 коњски сили, а помоќната 4x4 верзија располага со 400 коњски сили.
Литиум-јонската батерија овозможува автономија од 300, односно 500 километри, а за 30 минути брзо полнење батеријата достигнува 80% од капацитетот.
Послабата верзија забрзува од 0 до 100 км/ч за 7,6 секунди, а на помоќната се очекува дека ќе ѝ требаат 4,8 секунди да стигне од нула до стотка.
