Пет хокеари од канадскиот јуниорски тим кој го освои златниот медал на Светското првенство во 2018 година се соочуваат со обвинувања за сексуална злоупотреба.
Канадскиот весник The Globe and Mail вчера објави дека пет мажи се поврзани со наводен сексуален напад што се случил во јуни 2018 година и добиле наредба да се предадат на полицијата во градот Лондон, во канадската сојузна држава Онтарио.
Во својот извештај, The Globe and Mail не ги именуваа членовите на јуниорскиот тим кои би можеле да се соочат со обвиненија, но се шпекулира дека најмалку четворица од обвинетите моментално играат во НХЛ, додека петтиот е член на швајцарски клуб.
Полицијата најави дека на почетокот на следниот месец ќе одржи прес-конференција на која ќе извести за истрагата.
„Разбираме дека постои значителен јавен интерес за истрагата за сексуален напад која датира од 2018 година. Иако не можеме да обезбедиме ажурирање во овој момент, очекуваме да одржиме прес-конференција во понеделник, 5 февруари 2024 година за да споделиме дополнителни детали“, се наведува во соопштението.
ТСН објави во мај 2022 година дека една жена идентификувана само со нејзините иницијали во судските документи се спогодила за околу 3,55 милиони долари во тужбата што ја поднела против Хокеј Канада и другите обвинети, вклучително и осум неименувани играчи.
Жената го пријавила наводниот напад во хотелска соба во Лондон во јуни 2018 година по собирање средства за Фондацијата Хокеј Канада.