Скопје, 21 ноември 2019 (МИА) – Изминатото деноноќие најмногу дожд наврнал во Дојран, 27 литри на метар квадратен и во Струмица, 25 литри на метар квадратен, а најмалку во Тетово, само 1 литар на метар квадратен и Маврово, Прилеп и Крушево помалку од 1 литар.
По 18 литри на метар квадратен наврнале во Гевгелија и Берово, 16 во Куманово, 10 во Крива Паланка, 7 во Демир Капија и Виница, 4 во Скопје кај Зајчев Рид и 2 во Охрид.
Утрово најстудено било во Берово каде е измерена температура од 0 степени, а најтопло било во Дојран каде се измерени 13 степени.
Денеска времето ќе биде сончево со мала до умерена облачност, во текот на денот облачноста ќе се зголемува. По одделни котлини преку целиот ден ќе се задржи значителна ниска облачност. Во крајните југоисточни делови ќе има услови за локален дожд. Дневната температура ќе биде во интервал од 13 до 19 степени.
Во Скопје умерено до значително облачно. Температурата ќе достигне 16 степени.
