Со милион и пол евра по сезона, тинејџерот Елиф Елмас заработува повеќе од Горан Пандев и Илија Несторовски заедно.
Најплатен Македонец во италијанското калчо е оној кој последен дојде. Елиф Елмас со Наполи има договор до 2024 година кој вреди 1,5 милиони евра по сезона. Не е чудно бидејќи тој летово дојде како големо засилување за во иднина, со оглед на тоа што има 19 години.
Втор по заработка е напаѓачот Илија Несторовски кој летово од банкнотираниот Палермо премина во Удинезе. Популарниот „НестоГол“ заработува 600 илјади евра по сезона, а договорот му е до 2022. Сепак, Несторовски е во топ пет најплатените во неговиот клуб каде никој нема плата која достигнува милион евра.
Последен е најдобриот, оној кој постигна најмногу во кариерата. Горан Пандев во Џеноа зема „само“ 350 илјади евра по сезона, а договорот му истекува наредното лето кога најверојатно ќе замине во пензија. И покрај неговото реноме и богатата кариера, нормално е да не заработува многу со оглед на неговата возраст од 36 години.
Интересно, платата на Елмас е колку најплатениот играч нa Џеноа, летното засилување Данецот Ласе Шене.
Дејан Кулушевски, четвртиот Македонец во Серија А, но кој моментално настапува за Шведска, е најслабо платен со 250 илјади евра. Тој сезонава е на позајмица од Аталанта во Парма.
