Кошарка
НБА 2019/20

Зголемен бројот на заразени со коронавирус во НБА екипите

20. март 2020 - 9:09 | МИА

Клубовите Лос Анџелес Лејкерс, Бостон Селтикс, Филаделфија 76-ерс и Денвер Нагетс објавија за први случаи на заразени играчи и тренери со Covid-19.

Засега, името на само еден од заразените е јасно, а тоа е бекот Маркус Смарт од Бостон Селтикс. Смарт во видео порака рече дека бил тестиран пред пет дена, но дури сега ги добил резултатите. Во овој 120-часовен период, тој се ставил во самоизолација во својот дом и ќе продолжи сè додека не биде добро.

Лос Анџелес Лејкерс откри дека двајца играчи во нивниот состав се, исто така, болни со новиот вирус. Сепак, нивните имиња не се откриваат.

Најлоша е ситуацијата во Филаделфија 76-ерс каде се заразени три лица. Филаделфија исто така избра да остане доверлива и не ги откри имињата на пациентите, без разлика дали се кошаркари, тренерски персонал или помошен персонал.

Само за еден случај досега пријавуваат од Денвер, при што претставникот на клубот од Колорадо беше тестиран на 16 март и е ставен во карантин.

Во последниве денови, серија играчи во НБА се заразија со Covid-19. Болеста најпрво беше откриена во Руди Гобер и Донован Мичел од Јута Џез, потоа во Кристијан Вуд од Детроит Пистонс, а пред два дена од страна на Бруклин Нетс потврдија за четири случаи, од кои еден е sвездата Кевин Дурант.