Мексиканскиот боксер Канело Алварез стана најплатениот спортист на светот откако потпиша договор со спортскиот стриминг сервис DANZ вреден 365 милиони долари.
Мексиканецот со овој договор го надмина досегашниот најскап спортски договор на бејзбол играчот Џанкарло Стентон кој во 2014 година потпиша со Њујорк Јенкис на 13 години за 325 милиони долари.
На годишно ниво Алварез ќе заработува нешто помалку од фудбалерот на Барселона Лионел Меси, кој според инфомациите на Forbes има годишна плата од 84 милиони долари.
Договорот на Алварез опфаќа петгодишен период и 11 борби на моментално најголемата боксерска ѕвезда и повеќекратен светски шампион во средна категорија.
Првата борба на Алварез опфатена во договорот е на 15 декември во спортскиот храм Медисон Сквер Гарден против Роки Филдинг, во суперсредна категорија.
28-годишниот Алварез е роден во Гвадалахара. Во 53 борби во кариерата има забележано 50 победи, од кои 34 со нокаут, а доживеал само еден пораз, од Флојд Мејведер во 2013.
