Шефот на УФЦ, Дејна Вајт, ја објави веста која љубителите на ММА спортот ја чекаат со години - една од најголемите женски ММА ѕвезди, Кајла Харисон, потпиша договор и веднаш ќе дебитира на најголемиот настан во 2024 година - УФЦ 300 на 13 април во Лас Вегас.
Харисон (33) е двократна последователна олимписка шампионка во џудо од 2012 и 2016 година, по што влезе во ММА спортот во 2018 година и забележа 16 победи и 1 пораз во ПФЛ, а двапати го освои нивниот турнир и награди од милиони долари.
Таа ќе се бори со Холи Холм (42), поранешната шампионка на УФЦ во бантам категорија, на настанот УФЦ 300 во Лас Вегас.
Холм има скор од 15-6 во ММА, а се бореше против најголемите имиња. Дефинитивно борбата што ја одбележа нејзината кариера беше победата во 2015 година со нокаут по 56 секунди против Ронда Русеј на која ѝ го нанесе првиот пораз во кариерата.
И додека Харисон е веројатно најдобриот граплер на светот, Холм без сомнение е најдобра во удари, што не треба да изненадува бидејќи во својата боксерска кариера има 33 победи од 38 меча.
Покрај Харисон и Холм, публиката ќе ужива и во бројни врвни борби на настанот УФЦ 300, а досега ги потврдија борбите за титулата меѓу Џанг Веили и Јан Сјаонан и Џастин Гејџи и Макс Холовеј, додека ќе гледаме и спектакли во форма на борби помеѓу Чарлс Оливеира и Арман Чаруџан, Јиржи Прочаска и Александар Ракиќ и Калвин Катар и Алјамен Стерлинг.
Сепак, навивачите на ММА очекуваат на настанот да се најде и борба меѓу Конор Мекгрегор и Мајкл Чендлер.