Во тек е нова трансфер битка помеѓу двата најлути калчо гиганти - овој пат за Бразилецот Бремер кој одигра фантастична сезона за Торино.
Давиде Вањати, кој е директор во Торино, за Sky Sport Italia потврди дека Интер и Јувентус се наддаваат како би стигнале до услугите на централниот дефанзивец.
„Имавме вечера, сѐ добро помина со Интер, остваривме добар разговор. Ќе видиме, никаде не брзаме, трансфер пазарот трае долго и ќе видиме што ќе се случи. Разговараме со двата, Интер и Јувентус“. Италијанските медиуми пренесуваат дека во име на миланскиот клуб преговарал познатиот Бепе Марота.
Интер веќе со месеци се споменува како сериозен кандидат за потписот на 25-годипниот Глеисон Бремер Силва Насименту кој во Торино е од летото 2018 година кога за 5,8 милиони евра пристигна од бразилски Атлетику-МГ. Неговата вредност сега се проценува на 35 милиони евра, според реномираниот Transfermarkt.
Јуве во трката се вклучи веднаш откако го договори трансферот на Матајс де Лихт во Баерн за 80 милиони евра. Високата сума која ја добија за Холанѓанецот ги стави во пол-позиција бидејќи можат на Торино да му понудат сума повисока од оние 35 милиони плус додатни 5 милиони во бонуси колку што понудија „Нераѕурите“, кои во трансферот го вклучија и младиот играч од средниот ред Чезаре Казадеи.
Иако понудата на Јуве е поголема, италијанските медиуми инсистираат дека не треба да се отпишува Интер од една проста причина - Торино претпочита својот бисер да не го продаде по секоја цена во својот најлут градски ривал.
Од своето доаѓање во Серија А Бремер има одиграно 98 натпревари на кој постигна 11 гола и запиша 3 асистенции. Минатата сезона одигра 33 натпревари од кои на третина (10) беше капитен во отсуство на Андреа Белоти кој често беше повреден.