Легендарниот Пит Маравич со 3.667 поени беше најдобриот стрелец во историјата на НЦАА кошарката во последните 54 години, сметајќи и во машка и во женска конкуренција, а во неделата навечер беше престигнат од Кејтлин Кларк.
Пред натпреварот против Охајо Стејт, на кошаркарката на Ајова Хокиис ѝ недостигаа 18 поени за да го надмине постигнувањето на неверојатниот Пистол Пит, како што го нарекуваа во текот на неговата играчка кариера, а таа успеа да го направи тоа уште во првото полувреме. Поточно, со две слободни фрлања за три секунди пред да се оди на големата пауза.
„Воопшто не размислував за тоа кога ги изведував слободните фрлања, но кога го погодив второто и кога видов дека публиката во салата полуде, разбрав за што се работи“, рече Кејтлин само неколку моменти по соборувањето на рекордот, а по натпреварот додаде:
„Благодарам на сите што ме поддржаа, бидејќи немаше да можам ништо од ова без моите соиграчи кои беа покрај мене. Ѝ благодарам на публиката која не бодреше цело ова време и им благодарам за сѐ што прават, не само за женската кошарка, туку воопшто за женскиот спорт. Тие не се свесни колку ни значи нивната поддршка“.
Новата рекордерка го заврши мечот против Охајо со 35 поени, а покрај тоа запиша и 9 асистенции, 6 освоени топки и 3 украдени, а нејзиниот тим победи со 93:83.
И великанот Леброн Џејмс ѝ честиташе на Кларк за достигнувањето: „Честитки Кејтлин Кларк што стана најдобар стрелец на сите времиња“.
Иако бројките се на страната на Кејтлин Кларк, голем е бројот на оние што негираат дека таа го срушила рекордот стар повеќе од половина век на легендарната Маравич.
Многу едноставно. Кошарката која се играше во периодот од 1967 до 1970 година, кога Пит беше доминантен во НЦАА лигата, и онаа што се игра денес, речиси и да не се истиот спорт. Тогаш немаше шутеви за три поени, кои беа воведени дури во 1986 година, а и нападите не беа временски ограничени.
Маравич својот рекорд го постигна на само 83 одиграни натпревари и просечно бележеше по 44,2 поени по натпревар, а според тој параметар ретко кој ќе му се доближи.
Легендарниот Пит подоцна како член на Атланта Хокс, Њу Орлеанс Џез/Јута Џез и Бостон Селтикс направи одлична кариера во НБА, а почина на 5 јануари 1988 година на 40 години додека како кошаркарски пензионер со своите пријатели ја играше играта што најмногу ја сакаше и во која беше толку добар.
