Аргентинскиот волшебник Лионел Меси повторно игра во врвна форма, а синоќа во МЛС против Њу Ингланд постигна два гола и забележа две асистенции.
Интер Мајами гостуваше во Њу Ингланд, а губеше од 1. минута кога Томас Чанкалај ги доведе домаќините во водство.
Резултатот беше 1:1 на полувремето бидејќи Меси во негов стил ја прими топката дијагонално од десната страна, чекаше да падне голманот и потоа го погоди поблискиот агол.
Во 68. минута Серхио Бускетс и Меси нè вратија десет години наназад со одлична акција каква што направија безброј пати во дресот на каталонскиот гигант Барселона, а Аргентинецот и овојпат рутински ја заврши работата.
Меси својата одлична партија ја заокружи со две асистенции на крајот од мечот. Најпрвин во 83. минута му асистираше на Бенџамин Кремаски за 3:1, а потоа во 89. на Луис Суарес за конечни 4:1.
На овој начин Меси ги продолжи феноменалните настапи во МЛС. Тој пред денешниот натпревар постигна гол и асистираше во последните три дуели.
Најпрвин имаше гол и асистенција против Колорадо и Канзас Сити, додека против Нешвил запиша два гола и една асистенција.
