Поранешниот дански голман и сограч од златната генерација на сегашниот тренер ја пофали неговата работа и покрај тоа што резултатите се под очекувањата.
„Мислам дека тој заврши одлична работа. И тоа како ги надмина моите очекувања во поглед на тоа што може да се направи за краток период. Мора тоа да се напомене“, вели Данецот во интервју за CNN.
Петер Шмајхел и Оле Гунар Солскјер во Манчестер Јунајтед настапуваа заедно од 1996 до 1999 година кога Данецот замина во Спортинг. Токму во последната сезона триумфираа во Лигата на шампионите во незаборавното финале со Баерн кога Норвежанецот го постигна победничкиот гол во третата минута од судиското надополнување.
„Просто кажано, тој наследи шестгодишен период во кој тимот константно беше упатуван во различни правци. Презема тим со играчи кои работеа со Сер Алекс Фергусон, со Дејвид Мојс, со Луи ван Хал и со Жозе Мурињо. Сите тие се различни. Се разликуваат по нивниот пристап и по тоа какви играчи им се допаѓаат. Така да тој и немаше шанса да изгради тим по свој вкус“, смета Шмајхел.
Солскјер застана на клупата на „Црвени ѓаволи“ на 19 декември 2018 година како привремено решение, но откако управата беше задоволна од неговата работа, и покрај отсуството на резултатите, на 28 март 2019 потпиша тригодишен договор.
Петер Шмајхел е татко на голманот на Лестер и на репрезентацијата на Данска, Каспер Шмајхел.
