Тенис

Шарапова објави крај на кариерата

26. февруари 2020 - 14:58 | Кајгана / МИА

Руската тенисерка Марија Шарапова на 32 години ја заврши кариерата, а веста за тоа ја сподели на Instagram со фотографија од нејзиното детство.

Триесет и двегодишната тенисерка на ваков чекор се реши поради зачестените повреди кои ја спречија да се врати во претходната форма. Русинката се обидуваше изминатите 15 месеци да ги надмине проблемите, но не успеа.

Во 2016 година беше суспендирана поради користење забранета супстанца – мелдониум. Таа тврдеше дека не знаела дека лекот е на листа забранети супстанци на Светската агенција за борба против допингот.

Шарапова има освоено пет титули на Грен слем турнирите, првата на Вимблдон кога имаше 17 години.

Според Forbs, атрактивната Русинка до 2015 година, пред нејзината суспензија, заработи околу 30 милиони долари и е женски спортист со најголема заработка за 11 години.

По враќањето на терените кога заврши суспензијата во 2017 година, Шарапова се соочи со отпор. Некои официјални претставници на турнирите одбиваа да ја покануваат, додека некои од ривалките искажуваа незадоволство кога добиваше „вајлд карта“, тврдејќи дека е неправедно тенисерката која била санкционирана поради допингување, да добива „специјална покана“ за учество.