Наука

Rolls-Royce планира да изгради мини нуклеарни реактори

27. јануари 2020 - 14:18 | М.С.

Компанијата Rolls-Royce планира да изгради мини нуклеарни реактори во Велика Британија до крајот на оваа деценија.

Од Rolls-Royce за BBC потврдија дека постои план за изградба и управување на реакторите кој ќе се реализира до 2029 година.

Мини нуклеарните станици можат да се произведуваат масовно и да се доставуваат на локациите со помош на шлепери, а со тоа е полесно да се предвидат и трошоците.

Но, оние коишто се против овој план тврдат дека Велика Бритaнија во потполност треба да се откаже од нуклеарната енергија и да се фокусира на евтина и обновлива енергија.

Активистите за животната средина имаат поделени мислења кога станува збор за нуклеарната енергија- некои сметаат дека таа е опасна и е скапа, додека други пак сметаат дека се потребни сите технологии доколку сакаат да постигнат нулта емисија до 2050 година.

Оние коишто го поддржуваат проектот на мини нуклеарни реактори веруваат дека тие можат да им парираат на цените со евтини извори на обновлива енергија.

Планот е мини реакторите да се сместат во Камбрија или Велс, а вкупно би биле 10 до 15 на територијата на Велика Британија. 

Станува збор за мали реактори кои би можело да ги има во секој град, а нив дополнително ќе ги заштитат од можни терористички напади.