Италијанскиот јавен обвинител отвори истрага, поради сомнение за криминални дејствија при продажбата на фудбалскиот клуб Милан.
Под истрага е моментот кога кинескиот бизнисмен Јонгхонг Ли ја презема функцијата од Силвио Берлускони, пренесуваат италијанските медиуми.
Ли во април минатата година ги презема „росонерите“, финансиран со кредити од американскиот фонд „Елиот Менаџмент“, но се повеќе се шпекулира дека постоеле „сомнителни трансакции“ при продажбата на клубот.
Затоа обвинителот во Милан отвори истрага и тоа не е единственото прашање, бидејќи постои долг кон „Елиот“, како и стравување од УЕФА финансискиот фер-плеј.
Акционерите мораат да одобрат уште околу 35 милиони евра за управување на клубот до крајот на сезоната, а парите повторно ќе дојдат од „Елиот“, на кому веќе му се должат 303 милиони американски долари.
Затоа постои можност американската фирма да ја преземе контролата над Милан, доколку споменатиот долг не се плати до октомври.
Исто така, Милан ризикува да биде исфрлен од Европа за следната сезона, ако не успее да ги среди долговите пред состанокот во Нион на 19 април.