Од петте натпревари кои се одиграа синоќа во НБА лигата, најмногу возбуда и неизвесност понуди оној во Лос Анџелес, во кој Лејкерс и Селтикс се бореа за победата до последната секунда од мечот.
Лос Анџелес Лејкерс на домашен терен го совладаа тимот на Бостон Селтикс со резултат 108:107.
Стартерите на двете екипи имаа разочарувачки партии, а единствениот кој се одвои беше Кајри Ирвинг, кој постигна 33 поени, кои сепак не беа доволни за да се избегне пораз. Клупата на Лејкерси дојде подготвена за овој натпревар и тие имаа тројца играчи со двоцифрен број на поени кои го почнаа натпреварот од клупата, од кои двајца постигнаа повеќе од 20 поени.
Кајл Кузма беше најдобар стрелец на Лејкерс со 28 поени, од кои 17 дојдоа во последната четвртина. Џордан Кларксон постигна 22, а Лери Ненс 11 поени за да му помогнат на тимот од Калифорнија да дојде до победата.
Сепак, резултатот висеше на конец до последните секунди од натпреварот, кога Маркус Смарт имаше шут за победа на Бостон, но промаши. По натпреварот многумина излегоа со критики за тренерот на Селтикс бидејќи му го оставил последниот шут на натпреварот на играч кој не е познат како добар шутер.
Останати резултати:
Оклахома Сити Тандер – Бруклин Нетс 109:108
Сан Антонио Спарс – Кливленд Кавалирс 114:102
Голден Стејт Вориорс – Њујорк Никс 123:112
Орландо Меџик – Сакраменто Кингс 99:105