Мразот на Гренланд се топи седумпати побрзо отколку во деведесеттите години, посочува истражувањето на меѓународниот тим на научници, коишто ги проучуваа сателитските снимки од временски период од 26 години, пишува BBC. Заклучоците се објавени во научното списание Nature.
Проценката посочува дека островот Гренланд загубил 3,8 билиони тони мраз од 1992 година досега. Оваа загуба е еднаква на 10,6 милиметри повисоко ниво на морето. А што е најстрашно, тимот предупредува дека мразот ќе продолжи да се топи уште повеќе.
Кон крајот на овој век може да се очекува дополнително покачување на нивото на океанот и тоа до седум центиметри.
Ова претставува поголем ризик од поплави за повеќе од милион луѓе кои живеат веднаш до крајбрежјето.
Од друга страна, пак, Алјаска исто така е во опасност. Во Енкориџ, најгусто населениот град на оваа американска сојузна држава, на 4 јули беа измерени 32 степени.
Научниците нагласуваат дека проучувањето е приказ на тоа како Гренланд реагира на брзото затоплување на Арктикот.
