Според поранешниот претседател на „Нераѕурите“ само тројца играчи од сегашниот тим би се вклопиле во оној шампионскиот кој триумфираше во Лигата на шампиони.
За Масимо Морати веќе деветта година постојат два тима на Интер: оној со Триплета од 2010 и оној кој игра во моментот. Морати живее во минатото, и со право, бидејќи долги години вложуваше милиони за конечно таа 2010 година да го оствари сонот, да го искачи Интер на европскиот и светскиот врв и тоа под водство на Жозе Мурињо.
Доколку денешниот состав на Интер би играл во 2010 во времето на таа шампионска генерација со Милито, Ето, Снајдер, Занети, Пандев, Самуел, Жулиу Сезар, Лусиу, Маикон, Камбијасо, Киву, Кордоба, Матераци, Станковиќ, според Морати само тројца играчи некако би конкурирале за во тој тим, ако ништо друго барем за на клупа.
„Голманот, Хандановиќ, тој е дефинитивно важна алка во сегашниов тим. Од новите дечки... Да речеме дека Барела и Сенси се истакнуваат, тие добро се покажаа и одлично се вклопија. Ете, тие двајца и Лаутаро би можеле да играат за оној тим од 2010 година“, рече Морати.
Го пофали Хандановиќ, но него не го вметна во изборот. Покрај Жулиу Сезар ни одличниот Ханда не би имал шанса, а дури ни на клупата не би имало место со оглед на фактот што тогаш голман број два беше легендарниот Франческо Толдо.
Морати единствено ги вреднува до тоа ниво младите Стефано Сенси (24 год.), Николо Барела (22) и Лаутаро Мартинес (22). Тие би можеле да се носат покрај великаните од популарната Триплета.
