Словенецот Лука Дончиќ синоќа го предводеше Далас во победа од 125:107 во Хјустон, а тоа беше негов 65-ти настап сезонава со што ги исполни новите критериуми на НБА лигата за добивање поединечни награди.
Имено, меѓу тие награди е и вклучување во една од првите три петорки од сезоната, што ќе биде доволно за да се исполнат критериумите за потпишување на таканаречениот супермакс договор во летото 2025 година.
Со тој потпис Дончиќ би го имал најголемиот договор во историјата и најверојатно ќе стане првиот кошаркар кој во една сезона надминал 80 милиони долари.
Инаку, супермакс договор може да потпишат само играчи со минимум седум години искуство кои исполниле одредени услови, како што е избор во Ол-стар или Ол-НБА составот.
Вредноста на договорот за супермакс е 35 отсто од платата за дадена година, а според предвидувањата за 2025 година, тоа би значело дека Дончиќ би можел да потпише петгодишен договор вреден 346 милиони долари.
Дончиќ моментално е во втората година од петгодишниот договор од 215 милиони долари, па оваа сезона заработува 40 милиони долари, следната 43, па 46 милиони долари.
Да потсетиме, сопственик на најголемиот договор во НБА во моментов е Џејлен Браун од Бостон Селтикс, кој лани потпиша супермакс од 304 милиони за пет години.
