Наука

Кина: Откриен нов вид летачки диносауруси

10. мај 2019 - 13:18 | Б.С.Б.

Кинески научници открија нов вид летачки диносауруси кои по својот изглед наликуваат на лилјаци, пренесува CNN. Ова откритие дава нов поглед на процесот како диносаурусите се развиле во птици.

Во Лиаонинг, на североистокот на Кина 2017 година се пронајдени фосилни остатоци од овој необичен вид птици. Пронајдокот отпрвин ги збуни кинеските научници. Кинескиот палеонтолог Мин Ванг објави студија за фосилните остатоци, опишувајќи го новиот вид, кој го нарече Ambopteryx longibrachium.

Но, понатамошните истражувања покажале дека тоа е всушност ситен диносаурус терапос со уникатни предни нозе и мембрански крила. Фосилот е стар 163 милиони години и е втор во историјата кој прикажува диносаурус со крилја налик на лилјак, иако таа особина е видлива во праисториските летачки верверици, лилјаци и летачки влекачи. Единствен диносаурус со слични особини е Yiqi, опишан во 2015 година.

Yiqi и Ambopteryx припаѓаат на мало семејство диносауруси наречени scansoriopterygids. Кина е на чело на многу откритија на нови видови, особено низ фосилите со пердуви се покажа директната врска меѓу диносаурусите и птиците.