Nintendo Switch Online се очекува да се појави на пазарот некаде кон крајот на септември, со NES видео игри и можност за зачувување на прогресот преку cloud системи. Компанијата исто така најави дека корисниците ќе имаат на располагање библиотека на NES игри која постојано ќе расте.
Преку твит на официјалниот профил на Nintendo, овој понеделник компанијата покажа како ќе изгледа класичната видео игра „Super Mario Bros. 3“ на Switch конзолата.
Култната игра од 1988 година ќе биде помеѓу дваесетте бесплатни NES игри кои ќе им бидат понудени на претплатниците на Nintendo Switch Online сервисот, кој би требало да пристигне наредниот месец.
За сите информации од типот на цена, планови за во иднина, целосната листа на бесплатни игри и детали околу Nintendo Switch Online, посетете ја официјалната веб страница на Nintendo.
Неодамна, од Nintendo беше најавено дека новата видео игра „Super Smash Bros. Ultimate“ ќе има пет нови ликови со кои ќе може да играте, како и 103 нови нивоа.