Норвешка ќе стане првата скандинавска земја која ќе ја декриминализира употребата на дрога.
Повеќето пратеници во норвешкиот парламент гласаа за поддршка на декриминализацијата на дрогата во историски потег поддржан од конзервативците, либералите, лабористите и социјалистите. Пратениците ја повикаа владата да ја реформира својата политика за дроги.
Членот на Социјалистичката партија, Николас Вилкинсон, изјави дека целта е да се спречи казнувањето на луѓето што страдаат и наместо тоа да им се помогне да добијат соодветна медицинска нега.
Извештајот за користењето дроги во Норвешка, објавен годинава, покажува дека во 2014 година 266 лица починале како резултат на користење дрога, што е зголемување на бројот на смртни случаи во споредба со претходната година. Норвешка со овој потег ќе им се приклучи на Холандија, Уругвај, некои американски држави и на Португалија, која по декриминализацијата на поседувањето дрога, има најмал број смртни случаи поврзани со користењето психотропни супстанции во Европската Унија.
