Бродовите се закотвени во грчките пристаништа, а железничките услуги беа суспендирани во средата поради штрајкот на транспортните работници кои бараат повисоки плати за да се справат со зголемените животни трошоци.
Дури и автобусите и таксистите денеска не работат, па многу патишта во центарот на Атина се пренатрупани бидејќи жителите сами се возат на работа.
Возачите се приклучија на 24-часовниот штрајк на најголемиот грчки синдикат на приватниот сектор ГСЕЕ, кој вели дека платите на превозниците сè уште заостануваат зад оние на нивните европски колеги.
Грција овој месец ја зголеми месечната минимална бруто плата за 6,4 отсто на 830 евра, што е четврто такво зголемување во последните пет години, додека земјата закрепнува од децениската финансиска криза.
Но, работниците велат дека тоа зголемување не е доволно за да бидат во чекор со зголемените трошоци за храна и домување.
„Пораката е јасна. Работниците не можат да врзат крај со крај додека добиваат најниски плати и цените вртоглаво растат“, се вели во соопштението на GSEE, која претставува околу 2,5 милиони работници.
Конзервативната влада на премиерот Киријакос Мицотакис, која победи на реизборот во јуни минатата година, вети дека ќе ја зголеми месечната минимална плата на 950 евра до 2027 година, кога завршува нејзиниот мандат, и дека ќе ја зголеми просечната плата за повеќе од 25 отсто на 1.500 евра до истата година.