Некогашниот репрезентативец на Брегот на Слоновата Коска и поранешен десен бек на Арсенал сега живее како бездомник, иако во текот на неговата кариера настапуваше во познати европски клубови и заработи милиони евра.
Неговите проблеми почнаа кога се разведе од неговата жена Аурелија, која му зема сѐ, а во последните неколку месеци му забранува и да ги види неговите три деца.
„Сопругата секогаш се грижеше за нашите финансии бидејќи јас не знаев ништо околу тоа. Се опкружив со луѓе кои ми даваа погрешни совети и изгубив многу пари вложувајќи во погрешни работи. Бев наивен во врска со парите. Во Арсенал заработив 8 милиони евра, од кои 7 ѝ пратив на мојата жена, која ми зема сѐ, дури и машината за алишта. Сепак, најлошо е што не ми дозволува да ги видам нашите деца, кои многу ми недостасуваат“, вели Емануел Ебуе.
Сите негови работи ги спакувал во неколку ќеси и куфери и сега чека да го избркаат од куќата.
„Немам пари за адвокат, за барем да си го спасам покривот над глава. Тешко работев во животот и сега останав без ништо“, додава тој.
Ебуе беше дел од тимот на Арсенал кој играше во финалето од Лигата на шампионите во 2006 година, кога изгубија од Барселона со резултат 2:1.
Работите за брзо време се променија многу, бидејќи во краток период на Ебуе му се случија многу големи трагедии. Најпрво почина дедо му кој го одгледал, во сообраќајна несреќа почина неговиот брат, ФИФА го суспендираше на 12 месеци поради тужба од поранешниот менаџер, а на крајот мораше и да ја заврши кариерата поради здравствени проблеми. Тој вели дека во текот на овие неколку месеци неколкупати помислувал на самоубиство, но волјата за живот сепак била поголема.