Познатиот бразилски фудбалер Дани Алвес денеска излегува од затвор откако успеа да ги собере потребните милион евра неопходни за кауција.
Како што пишува Marca, судот во Барселона се согласил на негово привремено ослободување и Бразилецот денеска ќе го напушти затворот „Брианс 2“.
Поранешниот фудбалер на Барселона со месеци бараше предвремено ослободување од судот, но тоа секогаш беше одбивано наведувајќи го ризикот од бегство поради богатството на Алвес и високата куповна моќ.
Исто така, имајќи предвид дека Бразил нема договор за екстрадиција со Шпанија, Министерството за правда во неколку наврати претходно одлучуваше да го држи в затвор, но сега попушти.
Сѐ уште не е познато од каде Алвес ги добил парите, бидејќи семејството на Нејмар одбило да му помогне, иако претходно се тврдеше дека токму Нејмар му дал пари на својот поранешен соиграч од Барселона.
За потсетување, Алвес беше осуден на 4 и пол години затвор за сексуален напад извршен во Барселона на 30 декември 2022 година.
Сега тој ќе може на слобода да ја чека конечната пресуда.
Инаку, Дани Алвес никогаш официјално не ја заврши кариерата, но јасно е дека заврши со фудбалот на највисоко ниво. Неговиот последен ангажман беше во мексиканскиот УНАМ, кој му го раскина договорот по апсењето. Претходно играше за Барселона, Саун Паулу, ПСЖ, Јувентус, Севиља и Баиа.
Најдлабока трага остави во Барселона со 408 настапи, а со 43 освоени трофеи во текот на кариерата е меѓу најтрофејните фудбалери на сите времиња. За репрезентацијата на Бразил има 126 настапи на кои постигна 8 голови и беше дел од Мундијалите 2010, 2014 и 2022, Копа Америка 2007, 2011, 2015, 2016 (Сентенарио) и 2019, Купот на конфедерациите 2009 и 2013 и Олимпијадата 2020.
