Легендарниот француски фудбалер, а од денеска и самостоен тренер, Тјери Анри, во разговор со француските медиуми рече дека негов пример во тренерската кариера е Пеп Гвардиола.
Анри е именуван за нов главен тренер на тимот на Монако, откако клубот после разочарувачките резултати го отпушти Жардим, а сигурно е дека го очекува исклучително тешка задача да го врати овој тим на победничките патеки.
После неколку одлични сезони, Монако оваа година го плати цехот за сите излезни трансфери, во однос на тоа дека во претходните години ги продадоа речиси сите квалитетни играчи кои настапуваа за овој клуб.
После девет одиграни натпревари, Монако се наоѓа на 18 место на табелата со само шест освоени поени, а во новата сезона успеаја да запишат само една победа.
Анри на прашањето за тоа кој тренер е неговиот пример, тој рече дека има работено со многу експерти и дека научил многу работи, но посебно го издвојува Гвардиола, а исто така го пофали и поранешниот тренер на Арсенал - Арсен Венгер.
„Мојот пример е Пеп Гвардиола. Нема овде ништо добро или лошо, многу работи научив од него кога отидов во Барселона. Со него секогаш се зборуваше за играта, а некогаш поминуваа ноќи кога воопшто не спиевме и разговаравме за нови работи. Беше подготвен да промени некои работи, одеше чекор пред времето. Како нов тренер имам од кого да учам, а од сите менаџери со кои работев научив по нешто ново. Благодарение на Арсен Венгер научив што е професионализам“, рече Анри.
Монако во следното коло ќе му гостува на Страсбург, а потоа има едно гостување кај Клуб Бриж во рамките на Лигата на шампионите.
