Откако беше ослободен од лажните обвинувања за расизам, Франческо Ачерби и натаму го гледаат со други очи.
Дефанзивецот на Интер и репрезентативец на Италија сосема непотребно помина низ голгота откако Жуан Жезус лажно го обвини за расизам. Дефанзивецот на Наполи во жарот на играта успеа да најде некоја рачка и да си погра со Ачерби надвор од теренот.
Откако сите обиди да се оцрни во моментов најдобриот италијански дефанзивец пропаднаа, се огласи и самиот Ачерби, кој обвинувањата дека е расист ги отфрли како апсурди. А, какви и би биле кога станува збор за човек кој растел идолизирајќи го Жорж Веа?
„Минав голгота, видов како луѓето околу мене реагираат како да сум ослободен по 10 години затвор. Пресудата е ослободување, но тажен сум за тоа како сите ме напаѓаа без да знаат ништо. Воочив голем бес, како да сум убил некого“, рече Ачерби.
„Сега, откако бев ослободен, би сакал да ја кажам мојата вистина. Без да имам апсолутно ништо против Жуан Жезус, всушност спротивното, затоа што и мене ми е многу жал за него. Но, не можете да наречете човек расист за погрешно разбран збор во жарот на играта. И не можете да продолжите да го правите тоа дури и откако ќе бидам ослободен... Но, ова не е борба против расизмот, немаше расизам на теренот и јас не сум расист: мојот идол беше Жорж Веа. Кога ми беше дијагностициран туморот, добив телефонски повик од него што сè уште ме прави емотивен“, заврши тој.
Во жарот на играта Ачерби на Жезус му рече „ќе те помодрам“, алудирајќи на тоа дека ќе го истепа. Но, бидејќи изразот на италијански е „ti faccio nero“ (ти фачо неро), што во буквален превод значи „ќе те направам црн“, Бразилецот го сфати како расистички напад и го пријави Ачерби.
