Научниците во една нова студија испитуваа колку е исплатливо да се одгледуваат питони за храна и како тоа би влијаело на животната средина во споредба со конвенционалното сточарство.
Резултатите беа ветувачки: змиите брзо растеа, дури и кога не јаделе, и имаа добар сооднос на содржината на месо со консумираната храна (која вклучуваше пилешко и глодари).
Дополнително, питоните може да се хранат со отпадни протеини од други месни индустрии.
„Кога постат, питоните можат да ги регулираат метаболичките процеси и да ја одржуваат физичката кондиција, што ја зголемува безбедноста на достапноста на храна во нестабилни околности. Ова значи дека одгледувањето питони може да биде флексибилен и ефективен одговор на глобалната несигурност во храната“, рече херпетологот Даниел Натуш од Универзитетот Меквари во Австралија.
Натуш и неговите колеги набљудувале размножување на два вида питони (Malayopython reticulatus и Python bivittatus) на фарми во Тајланд и Виетнам повеќе од 12 месеци. Тие откриле дека односот на консумирана храна со произведеното месо (каде помалите бројки значат поголема ефикасност) е 1,2, во споредба со 1,5 за лосос, 2,8 за живина, 6,0 за свинско и 10,0 за говедско месо.
Змиите можат да постат неколку месеци без да изгубат голема телесна маса, што ги прави идеални за размножување во услови каде залихите на храна не се загарантирани - што, за жал, е многу честа појава ширум светот, пишува Science Alert.
Се разбира, малку е веројатно дека наскоро во продавниците ќе се појават специјални полици со змиско месо, но резултатите од студијата покажуваат дека овие животни би можеле да бидат сигурен и еколошки извор на храна.
Тука е и прашањето за „гурманството“, односно колку е всушност вкусно месото од питон.
„Додадејќи го на ова стравот што луѓето го имаат од змиите, може да помине некое време пред да се препознае земјоделскиот потенцијал на питоните на глобално ниво“, велат научниците.
Истражувањето Python farming as a flexible and efficient form of agricultural food security беше објавено во списанието Scientific Reports.