Македонските ракометарни фанови сѐ уште се во неверување по убедливиот пораз од 7 голови разлика синоќа во Торсхавн, кој Македонија ја оддалечи од пласман на Мундијалот 2025.
Селекторот Кирил Лазаров денеска даде свој коментар на случувањата синоќа во главниот град на оваа островска земја.
„Фарските Острови беа подобар противник на вчерашниот натпревар и заслужено победија. Ни направија многу проблеми и во нашиот напад каде бевме приморани да играме 7 на 6 доста време, а не сакавме да играме на тој начин. Нивниот напад беше технички скоро перфектен, иако бевме спремни за нивниот систем на напаѓање, сепак истите работи поминуваа. Нема да губиме надеж и ќе веруваме до крај. Имаме неколку дена да се консолидираме и да пробаме да ја анлуираме негативата од 7 гола. Ќе ни треба поддршка од публиката како никогаш до сега. Ќе се бориме и веруваме во позитивен исход во недела“, рече Лазаров, пренесува РФМ.
Реваншот се игра в недела од 19:00 часот во СЦ „Борис Трајковски“ во Скопје. Билетите по цена од 200 и 300 денари се продаваат преку продажната мрежа на MKTickets, како и онлајн на нивната веб-страница.
Директен пренос ќе врши МРТ1 со отворено студио половина час пред почетокот.
