Градот Мејперл, во американската сојузна држава Тексас, на неодамнешните избори го одбра 71-годишниот Филип Велтман за нов градоначалник. Единствениот проблем е што Велтман почина уште на 15 март годинава, откако се кандидираше за градоначалничката позиција.
Велтман, кој почина од здравствени компликации причинети од леукемија, доби 68 од вкупно 110 гласови, додека преостанатите 42 гласа му припаднаа на неговиот конкурент Џон Вејн Прут.
Мејперл е град кој според последниот попис во 2010 година имаше 934 жители. Сега, оваа мала американска општина се соочува со задачата за организирање на нови избори, бидејќи е повеќе од очигледно дека Филип Велтман нема да може да ја извршува функцијата. Тие се веќе распишани и ќе се одржат на 13 мај.
И покрај тоа што новите избори ќе се одржат без разлика на околностите во иднина, официјалните претставници на Мејперл мораа да се консултираат со државата Тексас за да знаат какви чекори треба да преземат во една ваква невообичаена ситуација.
Ова не е прв случај во САД каде што мртов човек е избран за победник на избори. Минатата година телевизиската ѕвезда Денис Хоф победи на изборите за место во државниот парламент на Калифорнија, иако почина неколку недели претходно.
„Мојот човек Денис Хоф го растури неговиот противник од задгробниот свет, поради тоа, вечерва славам за него“, изјави тогаш неговиот менаџер Чак Мат.