Играше за Македонија, па го викна Албанија, па се премисли да остане кај Македонија со напомена да остане во контакт со албанскиот селектор.
Адриан Зенделовски е 19-годишен играч од средниот ред кој игра во Шведска. Играше за младинските репрезентации на Македонија до 17 и 18 години, а сега е дел од У19 репрезентацијата која се пласираше во Елитната рунда на квалификации за Европското првенство.
Помеѓу двете квалификациски рунди, Адриан добил покана да игра за У21 репрезентацијата на Албанија. Албанските медиуми објавија дека му дал согласност на селекторот Албан Буши, по што ФШФ (Фудбалска федерација на Албанија) отпочнала процедура за комплетирање на потребната документација за промена на репрезентација кај УЕФА, но набргу ја стопирала оти Адриан се премислил.
Денеска албанските медиуми објавија дека Зенделовски ја издриблал Албанија оти сега сакал да игра за Македонија во Елитната рунда на квалификации за пласман на ЕУРО 2024, каде Албанија беше елиминирана во првата фаза. Тој веќе се најде на списокот кој селекторот Тони Јакимоски го објави синоќа.
Но, Зенделовски потоа има во план да ја издрибла и Македонија оти, како што пренесуваат албанските медиуми „му рекол на Буши да останат во контакт бидејќи мисли дека во иднина ќе ја претставува Албанија“.
Македонија У19 во Елитната рунда квалификации е во група со Швајцарија, Украина и Латвија. Натпреварите почнуваат наредната среда кога Македонија отвора против Украина на 20-ти од 14 часот на терените на ФФМ во Ново Лисиче. Три дена подоцна играме со Швајцарија, а на 26 март со Латвија, исто од 14 часот на терените на ФФМ.
Претходно од репрезентацијата се откажа Фета Фетаи, кој играше во првата фаза од квалификациите. Тој ја прифати поканата од Албанија без да дрибла.
Зенделовски во првата фаза го постигна голот за 1:1 против Казахстан, бод со кој завршивме втори во групата зад Германија, а пред Полска и Казахстан.
