Киев, 13 декември 2019 (МИА) – Украинскиот претседател Володомир Зеленскиј изјави дека во Донбас нема да се случи Сребреница, бидејќи Украина е „поинаква земја која ги почитува своите граѓани“.
- Ние сме поинакви луѓе, слободни, демократски. Сфаќаме дека таму живеат Украинци. И ние ги почитуваме граѓаните на Украина…. Нема да има никаков масакр… Ние сме поинаква влада. За нас е најбитен човечкиот живот. Затоа, не ги примам таквите заклучоци, истакна Зеленскиј во интервју за телевизијата 1+1.
Рускиот претседател Владимир Путин пред три дена изјави дека во Донбас може да се случи втора Сребреница доколку Киев воспостави контрола врз границата со Русија, а пред тоа да не ја обезбеди заштитата на граѓаните на Донбас, пренесоа руските медиуми.
Зеленскиј, исто така, смета дека некои точки од договорот од Минск можат да бидат променети, а посебно оние што се однесуваат на граничната контрола.
- Минаа четири години од Минск. Сѐ се менува во нашите животи. И ние сфаќаме дека не ние како администрација сме го потпишале Минск, но ние како влада сме должни да ги исполниме условите на кои тогашната влада се обврзала, изјави Зеленскиј.
Тој додаде дека, сепак, е сигурен дека некои работи можат да се променат.
- Некои работи ќе ги смениме, бидејќи токму предавањето на украинската државна граница под наша контрола после изборите, што дефинитивно е наш став, истакна украинскиот претседател.
