Министерството за здравство денеска објави дека има прв случај на заразен од коронавирус и во Битола.
Станува збор за доктор Христијан Трпчевски од приватната болница Плодност, кој на својот Facebook профил објави дека е носител на коронавирус и им се обрати јавно на битолчани да не го осудуваат.
Тој советува и при најмал сомнеж за добивање на вирусот луѓето да бидат упорни и да се тестираат за да го исклучат неговото постоење. Докторот посочува дека неговиот прв тест бил негативен и ако не го направел вториот тест, болеста ќе поминеше како грип.
Тој вели дека во последните 60 дена релацијата на неговото движење била болница „Плодност“- дома и обратно и никаде на друго место. Заклучува дека вирусот го добил од пациентка која била на преглед и покрај почитувањето на сите епидемиолошки мерки преземени во болницата како дезинфекција на раце, носење маски и визири и постојано бришење подови и други површини со средства за дезинфекција. И покрај сите преземени мерки и строгата контрола докторот објаснува дека е можно некој асимптоматски носител да го пренесе вирусот.
Сега тој јавно им се обрати на битолчани да не го осудуваат туку од целата ситуација да извлечат заклучок и при најмал сомнеж да се тестираат за да го исклучат постоењето на вирусот.
„Јас се тестирав и покрај тоа што ми е лекарска обврска да спасувам животи, спасив многу животи на поинаков начин“, вели докторот во обраќањето до битолчани.