Сагата за заминувањето на Килјан Мбапе од ПСЖ и неговиот трансфер во Реал Мадрид се чини дека конечно заврши и тој од 1 јули ќе стане нов играч на Кралскиот клуб.
Но, францускиот капитен нема да биде единствениот Мбапе во Реал. Имено, дресот на Реал ќе го носи и неговиот осум години помлад брат Етан.
Кога Килјан се пресели од Монако во ПСЖ во летото 2017 година, еден од условите што ги постави беше парискиот клуб да го донесе неговиот брат Етан, кој тогаш играше како 11-годишник за нисколигашот Бонди.
Помладиот Мбапе имаше вкупно 3 настапи во сениорскиот тим на ПСЖ, еден во Лига 1 и два во Купот на Франција, а над неговиот број 38 на грбот стои натписот Е. Мбапе.
Речиси седум години подоцна, дојде време Килјан да го напушти ПСЖ, а со него ќе замине и Етан.
Во суштина, приказната од 2017 година се повторува. Еден од условите за преселба на Килјан во Реал беше доаѓањето на неговиот помлад брат кој игра на позицијата централен играч за врска.
Така, од следната сезона во Реал ќе ги имаме браќата Мбапе, а шпанските медиуми најавуваат дека тие нема да бидат единствените браќа во редовите на Кралскиот клуб.
Имено, и Џуд Белингам лобира кај претседателот Флорентино Перес за доаѓањето на неговиот брат Џоб од Сандерленд.
