Во изминатите 24 часа во Грција, уште три лица починаа од коронавирусот, зголемувајќи го на 53, бројот на жртвите, додека пак регистрирани се 27 нови случаи на COVID-19 и уште 23 други во бегалскиот камп „Рицона“, а анализирани се 18.844 примероци, јави дописничката на МИА од Атина.
Паралелно, како што беше соопштено на денешната прес конференција во Министерството за здравство на Грција, на бродот „Елефтериос Венизелос“ што тргнал од Турција за Шпанија, но е закотвен на атинското пристаниште Пиреја, 119 лица се заразени со COVID-19, додека пак 250 од патниците се негативни на коронавирусот.
Заменик-министерот за цивилна заштита на Грција, Никос Хардаљас, рече дека за лицата кои што се здрави ќе започне процесот на репатријација, а заразените, кои што немаат никакви здравствени проблеми, ќе останат во изолација на бродот.
Бродот, во сопственост на грчка компанија, бил најмен за од Турција да пренесе работници во Шпанија, но 15-ина дена по тргнувањето останал закотвен во близина на Пиреја откако Турција одбила да го прими назад.
За време на постапката за репатријација на патниците, бил откриен првиот случај на COVID-19, по што бил направен тест и на останатите над 380 лица.
Вкупниот број на позитивни случаи на COVID-19 во Грција, денеска изнесува 1.514, вклучително и заразените во бегалскиот камп, но и екипажот на бродот.
Хардаљас рече дека бил регистриран и првиот позитивен случај на островот Миконос, заразената жена била пренесена во болница во Атина и најави дека се одложени сите градежни работи на островот. Истовремено, упати повик до жителите на островот да останат дома.