Стил

Versace се откажува од користењето кожа од кенгур

16. јануари 2020 - 12:34 | МИА

Италијанската модна куќа Versace се откажува од користењето кожа од кенгур во производството, под притисок на заштитници на правата на животните од организацијата ЛАВ.

„Можеме да потврдиме дека конечно прекинуваме со употребата на кожа од кенгур во нашите колекции“, соопшти Versace во електронско писмо до британското списание.

Гласноговорникот на ЛАВ, Симоне Павезе изјави дека активистите во многу прилики „покажувале на каков сè брутален начин кенгурите се убивани”. Освен тоа, во огромните пожари во Австралија, голем број животни, вклучително и кенгури, угинаа.

– Тоа е вистинска еколошка катастрофа, што претставува ризик да истреби многу видови животни од лицето на Земјата, додава Павезе.

Првата забрана за користење кенгурска кожа во своите производи беше наложена од Diadora, италијански производител на спортска облека, обувки и додатоци.

Европската Унија, како што јави The Guardian, е најголемиот увозник на месо и кожа од кенгур од Австралија. Во таа смисла, Италија е водечки увозник на кожа.

Модната куќа Versace е основана 1978 година од италијанскиот дизајнер Џани Версаче, застрелан во 1997 година од сериски убиец на прагот од својата куќа. Работата на креаторот потоа ја продолжува неговата помала сестра Донатела Версаче.