Уште не сме се навикнале на ВАР технологијата, а челниците на Премиер лигата одлучија од следната сезона да воведат пробно правило во врска со измената на играчи. Оваа промена би можела радикално да се одрази на текот на играта.
Следејќи го примерот на американската НФЛ, Премиер лигата сака да воведе посебен протокол за играчи кои во текот на играта добиле потрес на мозокот, што се смета за исклучително опасна состојба.
Англичаните ги претставија своите идеи пред ИФАБ, телото на ФИФА задолжено за промена на правилата и од следната сезона ќе примени едно од двете решенија за кои ќе се одлучува на 3 април.
Првиот предлог е играчот за кој лекарите се сигурни дека има потрес на мозокот да може „бесплатно“ да се замени, односно неговата измена да не влијае на вкупниот број од три дозволени измени, колку што имаат екипите според актуелните правила.
Втората идеја е играчот за кој постои сомнение дека има потрес на мозокот да биде изнесен од терен и да добие лекарски преглед во соблекувалната на 10 или 15 минути, а потоа ако е во добра состојба да му се овозможи да се врати во игра. За време на повредата би можело да биде заменет со играч од клупа кој би се вратил на клупа доколку повредениот играч би се вратил во игра.
Премиер лигата на 29 февруари ќе ги дискутира двата предлога со ИФАБ и ќе одбере еден за кој клубовите ќе гласаат во јуни на крајот на сезоната.