Во текот на средбта со шефот на руската дипломатија Сергеј Лавров, американскиот претседател Доналд Трамп ја предупреди Москва да не се обидува да се меша во изборите во САД и ја повика да се реши судирот со Украина, соопштија од Белата куќа.
Со Лавров разговараше и американскиот државен секретар Мајк Помпео кој порача дека е неприфатливо било кaкво странско мешање во американските избори и на Русија и другите земји им порача дека администрацијата на Трамп ќе го заштити интегритетот на гласањето, пренесе Voice of America.
На прес конференцијата со својот руски колега, со кого во Стејт департментот разговараше за контролата во вооружувањето, Помпео нагласи дека администрацијата на Трамп ќе го спречи мешањето во изборите.
-Јасно кажав дека тоа е неприфатливо и на Русија јасно ѝ ги изнесов нашите очекувања. Администрацијата на Трамп секогаш ќе работи на заштитата на интегритетот на изборите, нагласи Помпео.
Непосредно пред средбата со Трамп во Белата куќа, Лавров повторно ги отфрли обвинувањата дека Русија се мешала во американските претседателски избори во 2016 година.
Тој кажа дека Русија сакала да се објават детали од комуникацијата со Вашингтон која, како што наведе, ќе ја ослободела Русија од обвинувањето дека се меша во изборите, но дека САД тоа го блокирале.
Во соопштението на Белата куќа од средбата меѓу Трамп и Лавров се наведува и дека американскиот лидер ја нагласил својата поддршка за ефикансата глобална контрола во вооружувањето која не ја вклучува само Русија, туку и Кина.
