Американскиот претседател Доналд Трамп ги суспендираше сите летови од Европа кон САД, освен оние од Велика Британија за период од 30 дена. Оваа одлука претседателот на САД ја соопшти откако вчера беше прогласена пандемија на корона вирусот.
Трамп синоќа имаше видео обраќање до нацијата во врска со одговорот на федералните власти на пандемијата на вирусот, кој според прогнозите на Светската здравствена организација би можел да предизвика смрт кај пет милиони Американци.
-Ограничувањата ќе бидат прилагодени во зависност од ситуацијата на теренот, истакна американскиот претседател и ја потенцира потребата да се сочува смиреноста.
Американците, кои поминале низ соодветните процедури на проверка ќе бидат исклучени од забраната, заедно со карго превозот, рече Трамп и додаде дека ситуацијата ќе се набљудува, при што постои можност летовите да бидат обновени и порано од предвидените 30 дена, објави амрикански Sun.
Трамп вети дека ќе им овозможи на вработените Американци да останат дома, без да стравуваат од финансиски потешкотии.
ЕУ за одлуката на Трамп: Економско нарушување мора да се избегне
Европската унија денеска ќе ја процени одлуката на САД за забрана за патување од Европа наметната од американскиот претседател Доналд Трамп, нагласи претседателот на Европскиот совет, Шарл Мишел. Тој додаде дека „економско нарушување мора да се избегне“.
Твитот на Мишел, кој ја координира акцијата на лидерите на 27-те земји членки на ЕУ, следеше по одлуката на Трамп да воведе забрана за прифаќање туристи од Европа – но не и од Велика Британија што веќе не е дел од блокот – до САД за 30 дена во обид да се запре ширењето на новиот корона вирус.
