Архитектура

Toyota планира да изгради град на иднината

8. јануари 2020 - 16:00 | Б.С.Б.

Данското архитектонско студио BIG дизајнира прототип од градот на иднината за јапонската автомобилска компанија Toyota.

Наречен „Woven City“, проектот е во првата фаза на развој. Градот ќе биде наменет за 2.000 луѓе кои ќе тестираат возила, роботи и паметни домови во реална животна средина.

Дизајнот беше претставен на Саемот за технолошка индустрија Consumer Electronics Show во Лас Вегас со анимација создадена од лондонското дигитално студио Squint/Opera.

Проектот во Јапонија се очекува да започне во 2021 година. Главните улици ќе бидат користени од автономни возила, помалите улици од други начини на транспорт како велосипеди, скутери и слично, додека третиот тип на улици ќе биде целосно наменет за пешаци.

Градот ќе функционира како лабораторија за роботизирани автомобили, вештачка интелигенција и други технологии. Ќе биде населен со научници, истражувачи и останати жители.

Не е познато колку ќе чини овој проект.