Една од најголемите судиски кражби се случи во осминафиналето на Светското првенство одржано во Јапонија и Јужна Кореја во 2002 година. Судиите тогаш му помогнаа на домаќинот Кореја да ја исфрли Италија, а подоцна и да оди до полуфиналето.
Франческо Тоти, легендарниот италијански фудбалер кој е во пензија, не крие дека тој натпревар му е најтешкиот момент во кариерата.
„Тоа за мене е чист пенал бидејќи контакт имаше, корејскиот одбранбен играч ме сруши. Погреши, а јас слушнав свиреж и помислив – тоа е тоа. Ќе шутирам пенал и со тој златен гол ќе ја однесам Италија во четвртфинале. Наместо тоа, судијата не покажа на белата точка, туку дојде до мене, па прво ми покажа жолт, а потоа и црвен картон“, пишува Тоти во својата автобиографија, па открива и што се случувало во соблекувалната.
„За прв пат помислив дека нема смисла да продолжам да се борам. Дојдов во соблекувалната, ја скршив вратата и после 15 минути слушнав како трибините грмат и слават“, пишува иконата на Рома.
Италија четири години подоцна стана светски првак.
„Тогаш си ветив: Ќе одиграм уште едно Светско и тоа е тоа. Но, во тој меч толку промашувавме, што на крај му дозволивме на судијата да ни го украде натпреварот. Му овозможивме да им помогне на Корејците и тој тоа го стори“, додава Тоти.
За потсетување, еквадорскиот судија Бајрон Морено прво им подари пенал на домаќините, а потоа по водството им дозволуваше брутални стартови, а во продолжението му додели и втор жолт на Тоти поради наводно симулирање.
Морено подоцна поради местење на натпревари во Еквадор беше доживотно суспендиран од фудбалот, а во 2011 година е фатен во шверц на шест килограми хероин, па е осуден на две и пол години затворска казна.
