Го најавуваат како новиот Пирло, а доаѓа од Бреша, од тим кој испадна. Го бараа и Интер и Јувентус и многу други, а тој заврши во Милан.
Сандро Тонали откри зошто не ја одбрал ниту финансиски најдобрата понуда, ниту пак играчки најперспективната. Некогаш срцето знае да одигра решавачка улога и во фудбалскиот свет.
„Скоро сите навиваат за Милан од местото од каде доаѓам, вклучувајќи го и татко ми кој таа страст ми ја пренесе и мене кога бев мал“, почна Тонали на денешната прес-конференција на која официјално беше претставен како нов играч на Милан. Тој е родум од Лоди, гратче со 45 илјади жители на околу 40 километри југоисточно од Милано.
„Одамна сакав да го облечам овој дрес. Не му го кажав тоа на Масимо Лелино (претседателот на Бреша), но тој многу брзо сфати што тоа значеше за мене. Ми рече дека ќе остави на мене јас да го направам изборот и си го задржа зборот“.
Тонали во мај наполни 20 години. Во Бреша е уште од 2012 година кога во академијата се приклучи од Пјаченца, додека детските фудбалски чекори ги направи во тимот на Ломбардија Уно.
„Кога сфатив дека постои шанса да му се приклучам на Милан, ги затворив вратите за сите други клубови. Морав да одам во Милан. Морав“, вели Сандро.
„Мојот менаџер најмногу преговараше со Интер, па затоа и ме исклучи од преговорите, за да не ми се оттргне вниманието. Штом разбрав за Милан, а тој знаеше дека навивам за нив, зборувавме и го оставив за заврши работа со нив“.
Тонали уште како играч на Бреша лани дебитираше во репрезентацијата на Италија за која до сега собра 3 настапи.
