Светски познатата британска виолинистка Ванеса Меј вчеравечер одржа спектакуларен концерт во салата Борис Трајковски во Скопје. Атрактивна, возбудлива и иновативна на секој настап, Меј приреди ретко доживување за македонската публика која за првпат имаше можност да види звезда од ваков формат и музичка позадина.
Позната како виолинистка која свири класика стилизирана со елементи на техно, џез па дури и фламенго, со своите уникатни експериментирања ги воодушеви и македонските обожаватели кои дојдоа да го проследат нејзиниот концерт. Тргнувајќи од својата мисла дека „свири музика која секогаш оди напред“ во времето, Меј внесе малку од тој победнички дух и на сцената во Борис Трајковски.
Меј свири виолина од својата четвртта година, што и донесе прекар чудо од дете, кој пак го потврди на 13 години кога стана првиот солист на виолина на таа возраст што одржал концерт во Лондон. Нејзиниот микс на техно класика и донесе милиони продадени албуми во светот и милиони долари на банкарската сметка, поради што во 2006 година беше прогласена за најбогата музичарка под 30 години.
