Аргентина е нација за која фудбалот е навистина нешто свето, па ако Маркос Рохо не погодеше во самиот финиш од натпреварот против Нигерија, денеска веројатно ќе читавме извештаи од Аргентина за национална трагедија, катастрофа од епски размери, за тоа како паднале во депресија и никој не оди на работа, но сепак тоа не се случи.
Аргентина успеа некако да ја преживее групната фаза од Мундијалот во Русија, се извлече на „италијански“ начин за ерупција од воодушевувања на аргентинската нација, што во земјата, што во Русија, а богами и во сите делови на светот, па и во Антарктикот.
На социјалните мрежи се појави снимка од група на научници-истражувачи од Аргентина, кои моментално се наоѓаат на мисија на Антарктикот.
Не им сметаше ниту силниот ветар за да излезат од својата топла база и да го прослават голот кој ги одведе Гаучосите во нокаут фазата од Светското првенство.
