Цените на нафтата на меѓународните пазари пораснаа над 87 долари под влијание на индициите за посилна побарувачка и намалена понуда од водечките производители.
На лондонскиот пазар цената на барелот за испорака во мај беше за 33 центи повисока отколку на затворањето на тргувањето завчера и изнесуваше 87,22 долари. Завчера на затворање беше во плус од 1,55 долари.
На американскиот пазар цената на барелот за испорака во мај вчера порасна за 31 цент, на 82,47 долари. За истиот износ, цената на фјучерс договорите за испорака во април, кои истекуваат денес, порасна на 83,03 долари. Завчера на затворање беше со добивка од 1,68 долари.
На почетокот на неделата цените беа поттикнати од намалениот извоз од Ирак и Саудиска Арабија и индикации за посилна побарувачка и економски раст во Кина.
Производството на кинеската рафинерија се зголеми за 3 отсто во јануари и февруари во однос на истиот период минатата година за да се задоволи зголемената побарувачка за гориво за време на лунарниот новогодишен празник. Зголемени се и индустриското производство и прометот во малопродажбата, што бележи солиден почеток на годината.
„Податоците за побарувачката на нафта пријатно изненадија, а цените беа поддржани и од продолжувањето на доброволното намалување на понудата од ОПЕК + до крајот на јуни“, рече Џовани Стауново од UBS.
Позначајното зголемување на цените, од друга страна, го запре поголемиот руски извоз по нападот на украинските беспилотни летала врз нафтената инфраструктура.
„Нападите веројатно ќе ја намалат преработката на руската сурова нафта до 300.000 барели дневно, покрај редовните затворања на (рафинеријата) заради одржување“, напишаа во белешката аналитичарите на JP Morgan. „Помалку рафинирање ќе значи поголем извоз на сурова нафта“, додаваат тие.
Во март Русија ќе го зголеми извозот на нафта преку нејзините западни пристаништа за речиси 200.000 барели дневно, што ќе следи по месечниот извозен план од 2,15 милиони барели дневно.
Трговците се воздржани и поради седницата на американската централна банка и можните сигнали за каматните стапки, шпекулираат аналитичарите.
„Пазарот може да се консолидира во очекување на сигнал за намалување на каматните стапки од овонеделниот состанок на ФЕД“, изјави Сувро Саркар од банката DBS.
ОПЕК во посебен извештај објави дека во понеделникот барел нафтена кошница на нејзините членки поскапе за 93 центи на 85,71 долари.
