Siemens најави планови за одвојување и проширување на својот енергетски бизнис, додека истовремено ќе отвори 10.000 нови работни места во дигиталните индустрии и смарт инфраструктура.
Германскиот конгломерат се најде под засилен притисок изминативе години, откако нарачките за неговите производи од секторот за генерирање и пренос на енергија беа погодени од глобалното пренасочување на чиста и обновлива енергија.
Во соопштението од Siemens објавено вчера, гигантот вели дека од септември, 2020 година, бизнисот за природен гас и струја ќе биде одвоен. Siemens исто така ќе го припои својот дел од 59% во компанијата за обновлива енергија SGRE кон новоформираниот бизнис.
Компанијата вели дека ќе направи солидни инвестиции во области како електрична мобилност, смарт згради и складирање енергија, со што ќе се отворат околу 20.500 нови работни места ширум светот.
Со оглед на тоа дека се кратат работни места во други сегменти, бројот на нови работни позиции всушност ќе изнесува 10.000, според планот на компанијата да ги намали трошоците за 2,2 милијарди евра до 2023 година.
Заклучно со крајот на 2018 година, во Siemens беа вработени 379.000 работници ширум светот.
Се очекува денеска Siemens да го објави извештајот за кварталната заработка. Досега годинава вредноста на акциите на компанијата е зголемена за 5%.
