Владата на Шпанија вчера го одобри и го достави на усвојување протоколот за пристапување на Република Северна Македонија во НАТО во Парламентот.
Владата на премиерот Педро Санчез побара од Парламентот протоколот да биде ратификуван по итна постапка имајќи предвид дека Шпанија е последна од 29-те членки на НАТО што тоа го нема направено, пренесува шпанската новинска агенција ЕФЕ.
– Неопходно е ратификацијата да биде по итна постапка со цел да не се одложуваат заложбите на Шпанија како сојузник во НАТО за прием на Северна Македонија во Алијансата, се вели во образложението на шпанската Влада.
Владата во Мадрид во јули лани достави до Парламентот барање за ратификација на протоколот, но поради распишувањето на предвремените парламентарни избори на 10 ноември постапката беше прекината.
Лидерот на социјалистите Санчез на почетокот на месецов доби поддршка од Парламентот за да формира коалициска влада, со што се стави крај на речиси едногодишната политичка криза во четвртата по големина економија во еврозоната.
